Mizoramah naupang enkawltu nei lo Enkawl tura miin an lak 363 an awm

Social Welfare department hnuaia State Adoption Resource Agency (SARA) chhinchhiah danin, kum 2005 aṭanga kumin April thleng khan Mizoramah fahrah, enkawltu nei lo, enkawl tura miin fa anga an lak naupang 363 an awm.

SARA chhinchhiah danin, naupang enkawl tura lak 363 zinga 236 chu Mizoram chhunga mite'n an la a, a bak 27 chu Mizoram páwna mite hnenah pek an ni.

SARA hotute sawi danin, Supreme Court thupek leh Juvenile Justice Act, 2005-in a tarlan angin, nautê, a hringtu nu leh pate'n duh loa an tlanbosan leh, chhan eng emaw vanga enkawl thei lote chu mahni duh thua mi lo pek emaw, mi dang kuta lo hlan chhawn ve phal a ni lo.

Fa lak duhte chu Central Adoption Resource Authority (CARA)-ah online hmanga inziah luh a ni a, chumi hnuah sorkar enkawl adoption agency-a social worker-in an din-hmun a zir chiang ang a, naupang enkawl tlaka ngaih an nih chuan naupang lak tur awm dan azirin fa an lak tur ngaihtuahsak tur a ni.

Thil pawimawhte peihfel a nih hnuah Court-ah fa lak phalna an dil ang a, Court-in remtihna a pek hnuah dan angin fa lak theih chauh a ni.

Fa la duh nu leh pate chu rilru leh pianphungah mi pangngai, chhungkaw khawsak pangngai tak an ni tur a ni a, fa pali nei tawh chin tan fa lak phal a ni lo. Fa la duhte chu nupa an nih chuan kum hnih tal an innei tawh tur a ni.

Hmeichhia leh mipa, mahni chauha khawsa tan pawh fa hi lak theih a ni a; hmeichhia chuan hmeichhia leh mipa an la thei ve ve a, mipa erawh mipa chauh a la thei a, hmeichhe naupang lak phal a ni lo.