Raj Bhavan bula hrui hnawk thenfai nan hrui pawimawh ṭhenkhat tan a ni

Aizawl DC hnuaia Aizawl Beautification Committee chuan nimin khan Raj Bhavan bulah telephone leh television hrui pawimawh tak tak inthlung, a thlunna tur bika awm lote an tan (cut) a; cable TV operator-te hrui thlun pawh tan zingah tel mah se, nimin khan an siam ṭha leh nghal nia thu dawn a ni.

Thu dawn danin, Aizawl Beautification Committee hian Governor thupek angin Raj Bhavan compound vela hrui chi hrang hrang thlunte an tan a; hrui tante zingah a neitute'n an chhinchhiahte pawh a tel.

Aizawl Beautification Committee hian Aizawla hrui in-thlung hnawk lutuk chinfel tumin hrui thlungtute chu an hrui ṭheuh chhinchhiah turin an ti a, chhin-chhiahna awm lote chu neitu awm loa ngaiha paih theih a nih tur thu an puang. Committee thupek angin telephone leh TV operator hrang hrangte chuan an hruite an chhin-chhiah a ni.

Aizawl Beautification Committee chuan hriattirna chhuah nawn lehin, hrui chhinchhiah tawhte chu a thlun--
na tur bika an ruahmanah dah/thlun tur a nih thu a puang leh a; mahse, he hriattirna hi hrui neitu ṭhenkhatte chuan an dawng lo niin an sawi.

A thlunna tur bik ruahmana hrui awm lote chu nimin khan Aizawl Beautification Committee-a thawktute'n chep chatin, an chingfel a; chung zingah chuan LPS Vision hrui pawh a tel a, mahse, nimin vek khan an chinfel leh nghal avangin subscriber-te'n TV an en theih loh phah dawn lo niin an sawi. ZONET Cable TV hrui pawh a thlunna tura inthlung lo zingah a tel a, mahse thawktute'n an vil hman avangin cheh chah zingah a tel lo nia thu dawn a ni.

Hetih lai hian, telephone hrui eng emaw zat cheh chah a ni a, chu'ng zingah chuan BSNL, Airtel leh service provider dangte hrui pawh a tel niin an sawi.