Aizawlah NE huap Review meeting buatsaih

Nimin aṭang khan State Guest House, Challangah Regional review meeting on National Programme for Control of Blindness (NPCB) & National Programme for Prevention and Control Of Deafness (NPPCD)
ṭan a ni a; sorkar laipuia Ophthalmology deputy director general Dr Promila Gupta-in hmanpuiin, hmarchhak state hrang hranga programme officer-te an tel.

NPCB hi kum 1976-ah ṭan a ni a, mitdel tur vên, mit hrisel neih nana mipuite zirtir leh mit natna chi hrang hrang enkawl kawnga hma latu ber a ni. NPCB hnuaia Mizorama hmalaknate SPO Dr Lalremmawii'n a sawifiah.

Mizoram NPCB hi Health department hnuai-a district pakuaah a awm tawh a, district tinah eye ward leh eye operation theatre a awm tawh bakah, pakhat dang siam belh tum mek a ni. Tun dinhmunah Mizoramah mi 0.31% mitdel awm anga chhût a ni.

Aizawl Civil Hospital-ah kum 2008 khan Eye Bank din a ni a, Mizoram hi hmarchhak state-te zinga sorkar Eye Bank nei awmchhun a ni. Eye Bank-ah hian kum 2015-16 chhung khan mit darthlalang 139 lak a ni a, mi 70-te mit darthlalang thlaksak an ni. Sikul naupang zingah mit ṭha lo 3,814 hmuhchhuah a ni a, sikul naupang 1,651 hnenah tarmit a thlawnna pek a ni.

NPPCD hi Mizoram hi kum 2014-ah kalpui ṭan a ni a, Mizoramah NPPCD kalpui dan leh an dinhmunte chu state nodal officer Dr Eric Zomawia'n a sawifiah.

NPPCD hi Mizorama Health department district pali - Aizawl East, Aizawl West, Lunglei leh Champhaiahte kalpui a ni tawh a; programme-in a tum ber chu, bengngawng tihtlem leh bengngawn theihna laka invenna tura hmalak a ni.

Kum 2015-16 chhung khan NPPCD hian free clinic vawi 19 an buatsaih a, beng lama harsatna nei mi 807 hmuhchhuaha enkawl an ni. Beng lama harsatna nei mi 7,103 hmuhchhuah an ni bawk.

Regional review meet-ing hi India hmar-chhaka state hrang hrangte hnathawh dan thlirletna leh hmasawn zel dan tur ngaihtuahhona a ni a, vawiinah chhunzawma zawh a ni ang.