Damlo enkawl dana inrâwnkhawmna buatsaih

Synod Hospital leh Pallium India ṭangkawp chuan nimin khan Tourist Lodge, Chaltlangah 'Opioids for Advanced Care in Pain and Palliative Medicine' tih hmangin inrawnkhawmna an buatsaih a, Health minister Lal Thanzara'n a hmanpui.

Health Minister chuan, Synod Hospital-in inrâwn-khawmna an buatsaih chu lawmawm a tih thu sawiin, "Inrawnkhawmna hian damlote enkawlnaah thui takin a kaihhruai theih ka beisei. Palliative care chu thih hlauhawm dinhmuna ding mek tawh damlote leh an chhungte'n nun nuam leh hahdam zawka an hman theih nana an natna tawrh chhâwk zângkhai leh a zual zel tur ven dan kawng zawn te, an taksa natna mai piah lamah an rilru leh thlarau lama tawrhna awm theite enkawl hi a ni," a ti.

Lal Thanzara sawi dan-in, Aizawl Civil Hospital chuan kum 2006 aṭangin cancer damlote tan palliative services an ṭan tawh a; tunah chuan Mizoram State Cancer Institute, Zemabawkah pawh Palliative Care Unit siam tawh niin, damlo inziak lutte chu morphine a thlawna pek an ni. District hospital tinah kum hnih chhungin Palliative Care Clinic ṭan tura rua-hman mek a ni bawk.

Inrawnkhawmnaah hian Pallium India chairman Dr MR Rajagopal chuan palliative care chungchang a sawi.

February 2016 aṭang-in Synod Hospital-ah Pain & Palliative Care Project ṭan a ni a, tunah hian doctor pakhat leh nurse pathumten training chhuak tawhin, project an enkawl mek. Palliative care hi damlo tihdamna ni loin, an natna leh na tawrh tihziaawmna lam hawi a ni.