RUSA hnuaia hmalaknate thlirho

Mizoram State Higher Education Council (SHEC) chu nimin khan Aijal Club-ah an chairman, Higher & Technical Education minister R Romawia hoin an ṭhukhawm a; Rashtriya Uchchatar Shiksha Abhiyan (RUSA) hnuaia hmalakna hrang hrangte an thlirho.

Meeting-a tarlan dan-in, RUSA hnuaiah college tihhmasawnna, infrastructure grant dawng college 21-te hnenah (central leh state share) first instalment cheng nuai 12.5 leh cheng nuai 93.75 ṭheuh pek chhuah an ni tawh. College hrang hrangte chu tihchangtlun zel an ni a, an hmasawnna chu a taka hmuh theihin a awm mek zel niin an sawi. College-te hi 12th Plan chhungin cheng nuai 200 ṭheuh hmu tura ngaih an ni.

Hrangbana College leh Zirtiri Residential Science College-te model college-a hlankaina tur pawh RUSA kalphung pangngai angin cheng nuai 400 pek turin Project Approval Board (PAB)-in a phalsak tawh a, first instalment (central & state share) cheng nuai 50 ve ve pek an ni tawh.