NIFAA-in Health Minister an chawimawi

National Integrated Forum of Artists & Activists (NIFAA), Mizoram Chapter chuan nimin khan Health minister Dr R Lalthangliana chu Covid-19 donaah thawk ṭha an tih avangin a pisaah chawimawina an hlân.

Dr R Lalthangliana chuan, chawimawina chu phû lo a intih thu sawiin, "Ka mimal hnathawh ṭhat vang ni loin, Zoram mipui leh khawvel hmun hrang hrang aṭanga Pathian hnena kan ṭawngṭaina luang khawmin a hrin chhuah - mipui, sorkar mi leh sa te, fronline worker, volunteer, task force, kohhran leh tlawmngai pawlte thawhhona rah a ni a, an aiawhin chawimawina hi ka pawm a ni," a ti.

Health Minister chuan, Covid-19 donaah rálbáng thei bik an awm lo tih sawiin, "Governor-in min ngaihvenpui em em a, hmanhmawh taka sum hman a ṭul ṭhin avangin Chief Minister-in rang taka hma min laksak ṭhin avang leh min kaihhruai avangin kan hmingṭha a ni," a ti a; minister leh MLA zawng zawng pawhin ṭhahnemngai taka hma an lâkpui thu a sawi.

NIFAA, Mizoram Chapter hruaitute chuan, India ram state zawng zawngah an inzár pharh tih sawiin, "Kan kum 20-na denchhenin Covid-19 dona kawnga ti ṭha state tinah pakhat ṭheuh chawimawina hlan a ni. Health Minister hi hripui léng karah mipuite chîâi lo leh sahimna turin a hna a thawh ṭhat avang leh kawng hrang hranga a hmalakna a chhuanawm avangin chawimawina hi kan hlan a ni," an ti.