Vawiinah LC leh VC inthlan a ni dawn; 'Tluang taka inthlan kan beisei' - SEC

Vawiin hian autonomous district council (ADC)-in a huam loh zawng district pakuaah village council (VC) leh local council (LC) thlan a ni dawn. State election commissioner (SEC) Dr H Lalthlangliana chuan, tluang taka inthlan theih an beisei thu a sawi.

LC leh VC inthlanah hian zing dar 7-ah vote thlak ṭan theih a ni dawn a, tlai dar 4 thleng vote thlak hun hawn a ni ang. Vote tlate chu zan dar 7 aṭangin chhiar ṭan a ni dawn a, inthlan ṭhat ngai a awm a nih chuan naktuk Ningani zing dar 7 aṭanga tlai dar 4 inkarah vote thlâk ṭhat a ni ang.

VC/LC atana thlan tlinte chuan February 14, 2025 ral hmain executive body an din tur a ni a, inthlan kaihhnawih thil zawng zawng February 15, 2025-ah zawh vek tura ruahman a ni.

Vanglaini palai zawhna chhangin SEC Dr H Lalthlangliana chuan, tluang taka inthlan an buatsaih theih an beisei thu a sawi a, "Harsatna a awm kan hre lo. Ruahman angin engkim a kal tluang thei turah kan ngai, theihtawp kan chhuah," a ti.

Dr H Lalthlangliana chuan, nimin khan polling party-te chu an duty na hmun tur thleng kim tura beisei an nih thu sawiin, "Polling party zingah harsatna tâwk report dawn kan nei lo," a ti a; buaina awm loa inthlan zawh theih ngei an beisei thu a sawi.

VC/LC inthlan buaipuitu tur polling party-te chu nimin khan inthlanna atana hmanraw pawimawh - ballot box, ballot paper leh ṭul dangte dispatch centre hrang hrang aṭangin pek an ni a; nimin vek khan an duty-na tur polling station an pan a ni.

A tira ruahman dan chuan inthlan hi VC 544 leh LC 111-ah buatsaih tur a ni a, chuhtu awm loa tling an awm avang leh candidate zingah thi an awm avangin hmun ṭhenkhatah inthlan buatsaih a ngaih loh bakah, vawiina inthlan buatsaih theih lohna turte a awm.

VC inthlan turah hian voter 4,377,08 awmin, mipa 2,15,610 leh hmeichhia 2,22,098 an ni a, mipa aiin hmeichhia 6,488-in an tam.

Aizawl Municipal Corporation chhunga local council 87-ah voter 2,44,726 awmin, mipa 1,13,303 leh hmeichhia 1,31,423 an ni a, hmeichhe voter 18,120-in an tam zawk.

Lunglei Municipal Council hnuaia LC 24-ah voter 41,206 an awm a, mipa 19,364 leh hmeichhia 21,842 niin, mipa aiin hmeichhia 2,478-in an tam zawk bawk.