Governor-in department 4 hotute a kâwm

Governor Gen. Vijay Kumar Singh chuan nimin khan Raj Bhavan-ah department pali - Rural Development, Agriculture, Animal Husbandry & Veterinary leh Fisheries hotute a kâwm a; langtlang leh rintlak zawka hmalak a nih theih nan digitisation ngai pawimawh turin department hotute a chah.

Gen. Vijay Kumar Singh chuan, sorkar laipui scheme hrang hrang hnuaia Mizorama hmalaknate hriat chian a, harsatna tawhte sorkar laipuia bawhzui thuai a nih theih nan inkawmna chu buatsaih a nih thu a sawi.

Mizorama self help group-te thil siam chhuah sawngbawl dan leh zawrhna tura hmalak dan chu fakawm a tih thu sawiin Larsap chuan, "Hmasawnna rahbi thar, loneitute tana ṭha zawk leh thlanawm tak ngaihtuah zel u la. Organic thlai thar lamah ṭan lain, ran hriselna leh sangha thar chhuah kawngah hmalak a ṭul," a ti. Langtlang leh rintlak zawka hmalak a nih theih nan digitization ngai pawimawh turin department hotute chu a chah.

Governor chuan, mipuite'n an tana ruahman hamṭhatna hrang hrangte an hriat chiana an chhawr ṭangkai theih nan scheme chungchang hriattir leh chhawmdawl kawnga theihtawp chhuah zel turin department hotute a chah a, "Scheme ṭang kawp theite pawt khawm a, hmasawnna ruhrel ṭha leh ro tling siam lam ngaih pawimawh a ṭul," a ti.

Inkawmna hrang hrangah hian department pali hotute'n an hmalaknate a lem nena entirin an sawifiah a; sorkar laipuia bawhzui ngai harsatna an tawhte Governor hnenah an thlen a ni.