KHAWTHLIR

Silai hman khap

Aizawl District Magistrate chuan thupek chhuahin, VC leh LC inthlanah boruak ralmuang leh muanawm tak hnuaiah vote thlak leh, tluang taka vote chhiar a nih theih nan Aizawl district chhungah silai pài/ken chhuah leh hman a khap. Silai neitu/kawltu zawng zawngte chu inthlanna kaihhnawih thil zawng zawng zawh a nih hma chuan silai leh silai mu keng chhuak lo tur leh hmang lo tura hriattir an ni. Thupek hian military/para military force, BRTF, police officer, election-a duty leh district magistrate-in phalna a pêkte a huam lo.

Medical assistance

Assam Rifles chuan nimin khan Tipa (Tuipang), Siaha district-ah Medical Assistance Programme an buatsaih a, mi eng emaw zat hriselna dinhmun an enfiah. Hriselna atana pawimawhte inzirtirna hun an hmang nghal bawk.

Safer Internet Day

Serchhipa National Infomatic Centre (NIC) chuan nimin khan him zawka internet hman dan inzirtirna ‘Safer Internet Day’ an hmang. Day pual hian Serchhip NIC chuan Serchhip district-a department tinah email hmangin lehkha pawimawh leh document kaihhnawihte an thawn a, him zawka internet hman dan inzirtir turin an ngen. Safer Internet Day hi February thla chawlhkar hnihna Thawhlehni apiangin khawvel pumah hman ṭhin a ni a; kumina thupui chu 'Together for a better internet' tih a ni.

Deworming Day

Lorrain English School, Siahaah nimin khan National Deworming Day 2025 February Round hawn a ni a; naupangte'n rûlhût hlo an ei a pawimawhzia inzirtir a nih bakah, naupangte rûlhût hlo eitir nghal an ni. National Deworming Day hi naupang kum 1 aṭanga tleirawl kum 19 inkarte'n rûlhût an pai lohna tura kum khata vawi hnih (thla 6 danah) rûlhût hlo pek beihpui thlakna a ni a; February Round hi February 10 khan ṭan ni mah se, Siahaah chuan nimin khan an ṭan a ni.