SBI-in ventilator 7 sorkarah an hlân

SBI Foundation chuan nimin khan Mizoram sorkar hnenah ventilator pasarih an pe. Ventilator hi SBI Aizawl Region regional manager LP Lalchangkima leh a thawhpuite'n Health Minister pisaah Dr R Lalthangliana hnenah an hlân.

Health Minister chuan, SBI inpekna ropui a tih thu sawiin, "Covid-19 donaah an thawk ṭha hle. Kumin June thla khan kan mamawh vanglai takin PPE ṭha tak 600 lai min lo pek tawh a, ventilator pawh pathum min pe tawh. Chief Minister's Relief Fund-ah an hlawh an thawh khawm aṭangin cheng nuai 7 an hlân tawh bawk. Zoram mipuite'n in hnathawh hi kan hre reng ang," a ti.

Dr R Lalthangliana chuan private hospital leh private laboratory-ahte Covid-19 sample test leh Rapid Antigen Test kalpui ṭan a ni tur chuan sample test chungchangah nasa taka a chhawk zangkhai theih tur thu a sawi.

LP Lalchangkima chuan, ventilator an pekte chu SBI corporate social responsibility (CSR) kaltlanga pek a nih loh thu sawiin, "SBI malsawmna dang SBI Foundation kaltlanga pek a ni," a ti a, a ṭul a nih chuan ventilator bun thlenga puih an inhuam thu a sawi.

SBI-in Mizoram sorkar hnena ventilator pasarih an pekte chu Agva Healthcare siam 'Agva Ventilator (AV-AD-COVID)' a ni a, pakhat Rs. 1,48,550 man niin, pasarih atan GST nen Rs. 11,64,632 an séng a ni.