Lokayukta-ah thubuai 71 ziak lut tawh

Lokayukta chairman Lalmalsawma chuan nimin khan Governor Gen. Vijay Kumar Singh hnenah Mizoram Lokayukta Fifth Annual Report 2023-2024 a hlan a, Mizoram Legislative Assembly budget session-ah pharh a ni ang. Mizoram Lokayukta-ah thubuai 71 ziah luh a ni tawh tih tarlan a ni.

Annual Report hian April 1, 2023 leh March 31, 2024 inkar a huam a; Governor Gen. VK Singh hian Lokayukta Chairman leh member pahnih - Lalsanglura leh Joel Joseph Denga te chu an hmalakna hrang hrangte a sawipui nghal.

Mizoram Lokayukta Report-in a tarlan danin, kum 2023-24 chhung khan Lokaukta-in eirûkna thubuai pariat an ziak lut a, preliminary inquiry tura tih niin, thubuai pasarihah report an dawng tawh.

March 2019-a Mizoram Lokayukta din a nih aṭanga February 10, 2025 thleng khan Mizoram Lokayukta hnuaiah thubuai 71 ziah luh a ni tawh a, chu'ng zinga 46 chu chhui zui tlaka ngaih a ni. Case hearing ṭum 38 neih tawh a ni a, thiam loh chantir pali leh thiam chantir pakhat an awm tawh. Department proceeding tura tih thubuai pathum a awm tawh bawk.

Lokayukta report Governor hnena thehluh hi Mizoram Lokayukta Act, 2014 Section 47-in a phût anga tih a ni.