Sample endik zinga 2.52%-in hripui an vei

Mizoramah Covid-19 vei leh vei loh hriat nan swab sample 62,407 endik a ni tawh a, chu'ng aṭang chuan hripui vei mi 1,585 (2.52%) hmuh chhuah tawh a ni. Hripui vei zinga mi 541 chu sipai leh paramilitary force mite niin, mi 859 chu civil mi an ni. Hripui vei hmuh zingah Mizoram chhunga kái chhâwng nia hriat mi 380 an awm.

Mizoram chhungah swab sample endik theih a nih hmain Mizoram páwna hmun pathumah sample 58 endik a ni hman a, Covid-19 vei mi pakhat hmuh chhuah a ni. Zoram Medical College laboratory-ah April 7, 2020 aṭangin swab sample endik ṭan a ni a, September 20, Pathianni thleng khan sample 43,564 endik a ni tawh. District hrang hranga TrueNAT laboratory-ah sample 3,101 leh Rapid Antigen Test (RAT) hmangin sample 15,685 endik a ni tawh bawk.