Vawiinah vote thlâk dawn

Village council thlan tura candidate thih vanga nimina vote thlak theih lohna Lunglei district-a Lalnutui khuaah vawiin hian vote thlak a ni dawn a; inthlan buaipui tur polling party-te'n nimin khan Lunglei DC pisa tual aṭangin Lalnutui an pan.

Lalnutuiah hian vote nei mi 192 an awm a, mipa 94 leh hmeichhia 98 an ni a, zing dar 7 aṭanga tlai dar 4 inkarah vote thlak hun hawn a ni ang. VC seat pathum (general seat pahnih leh reserved seat pakhat) awmin, inthlan chuhtu candidate 10 an awm a; candidate-te chu INC candidate pahnih, MNF candidate pahnih, ZPM candidate pathum leh independent candidate pathum an ni.

Candidate thih vanga vote thlak hun sawnna dang, Lawipu Local Council-ah chuan naktuk February 14-ah vote thlak a ni dawn. Lawipu LC inthlan turah hian Congress candidate pakhat chu February 10, 2025 zan khan a thih avangin inthlan hun sawn a ni a, a hmain candidate pakhat a lo thi tawh bawk.