LADC-ah MNF+Congress sorkar a tla; ZPM leader atan V Zirsanga thlan a ni

Lai Autonmomous District Council (LADC)-a MNF leh Congress party inṭâwm sorkar chu nimin khan fiah a ni a, a tla. ZPM MDC-te chuan sorkar siam an tum a, nimin vek khan leader atan Paithar bialtu MDC V Zirsanga an thlang.

Governor thu angin nimin khan LADC sorkar bûk turin session koh a ni a; mahse, chief executive member (CEM) C Lalmuanthanga'n nimin vêk khan CEM aṭanga bànna a thehluh avangin a kaihhruai sorkar chu bûk ngai loin a tla a, session tihtawp nghal a ni.

LADC-ah hian mipui thlan tlin MDC 25 an awm a; nimin vêk khan thláwptu MDC 13 neia inngai ZPM Legislature Party chu an ṭhukhawm a, leader atan V Zirsanga, deputy leader atan Mangmung Chinzah, secretary-ah LR Dingliana Chinzah leh treasurer atan BN Thangpuia te an thlang. ZPM hian Governor hnenah sorkarna an siam theih thu an thlen ang.

ZPM-in leader atana an thlan V Zirsanga leh deputy leader atana thlan Manghmung Chinzah te hi kum 2020-a LADC inthlanpuiah MNF party aṭanga thlan tlin an ni a; MNF-in sorkar an siam tirhah Manghmung Chinzah hi CEM a ni a; V Zirsanga pawh a hnuah CEM a ni bawk.

LADC-ah hian December 4, 2020-ah inthlan a ni a, MNF-in hneh takin sorkar an siam thei a, December 14, 2020-ah CEM atan Manghmunga Chinzah lak luh a ni. Manghmung Chinzah kaihhruai sorkar chu August 26, 2021-ah paih a ni a, September 6, 2021-ah CEM atan V Zirsanga lak luh a ni.

V Zirsanga hian corruprion case-ah Special Court (PC Act)-in thiam loh a chantir hnuah March 7, 2024 khan bànna a thehlut a; LADC chu Governor's Rule-ah a awm zui. MNF MDC 12 leh Congress MDC neih chhun C Lalmuanthanga ten CEM atana ruat C Lalmuanthanga kaihhruaiin May 14, 2024 khan sorkarna an siam leh a ni.

V Zirsanga'n kum 2024-a bânna a thehluh bâwr velah MNF MDC pariat leh independent MDC pahnihin ZPM an zawm a, BJP MDC awm chhun T Zakunga pawhin a zawm. Tun hnaiah MNF MDC pahnih V Zirsanga leh Lallawmsanga Apeto te'n ZPM an thlawp leh tâk avangin ZPM hian MDC 13 an nei ta a ni.