Covid-19: Mizoram dinhmun Hripui vei mi 7 hmuh belh

September 20, Pathianni khan Mizoramah Covid-19 vei mi pasarih hmuh chhuah a ni a, hripui vei enkawl zinga mi 10 chu nimin khan chhuahtir an ni thung. March 24 aṭanga nimin thleng khan Mizoramah Covid-19 vei mi 1,585 hmuh chhuah a ni tawh.

Sorkar thuchhuah tarlan danin, Pathianni khan ZMC laboratory-ah mi 1,030-te swab sample endik aṭangin  Covid-19 vei mi pali hmuh chhuah a ni a, Lawngtlai District Hospital-ah TrueNAT-PCR hmangin mi pahnih leh Rapid Antigen Test hmangin Mamitah mi pakhat hmuh chhuah a ni bawk.

Nimin khan Covid-19 vei zinga dam tawh mi 10 chhuahtir an ni a; State Referral Hospital aṭangin pathum, ITI Venga CCC aṭangin mi paruk leh Lawngtlai CCC aṭangin mi pakhat chhuahtir an ni.

Mizorama Covid-19 vei hmuh chhuah tawh mi 1,585-te chu mipa 1,302 leh hmeichhia 283 an ni a; an zinga mi 1,012 (63.85%) chu chhuahtir an ni tawh a, mi 573 (36.15%) an la chhuak lo. La chhuak lo zingah hripui vei tawh lo, negative tawh an awm nual bawk.

September 20-a ZMC laboratory-a Covid-19 positive hmuh chhuahte chu mipa pahnih (kum 22 leh 42) leh hmeichhia pahnih (kum 1 leh 18) an ni a, Durtlang Leitan venga khawsa vek an ni. An vai hian Mizoram chhunga kái chhâwng an ni a, an zinga pahnih chuan taksaah harsatna (Covid-19 symptom) an nei niin sorkar thuchhuah chuan a tarlang.

TrueNAT-PCR hmanga Lawngtlai Hospital-a hripui vei hmuh chhuahte chu mipa pahnih, hnam dang ve ve, kum 25 leh kum 40 an ni a; state páwn aṭanga rawn lut, September 11, 2020-a Lawngtlai thleng leh 71 RCC quarantine centre-a awm lai an ni.

RAT hmangin Mamit­ah mipa pakhat, kum 26-in Covid-19 a vei tih hmuh chhuah a ni bawk a; Assam aṭanga rawn lut, Power & Electricity department hnuaia hna thawk niin, Covid-19 symptom a nei lo.

September 20 khan ZMC laboratory-ah swab sample 1,030, Lawngtlaiah sample 26 leh RAT hmangin district paliah sample 413 endik a ni.