Kengmei Ven Hapta hman dan tur rel

Siaha District Level Fire Prevention Committee chu nimin khan DC conference hall-ah an chairman VL Hruaizela Khiangte, DC hoin an ṭhukhawm a, kumina Kangmei Ven Hapta hman dan tur an rel.

VL Hruaizela Khiangte chuan loneitute tana lo hal theih hun hnuhnung ber chu March 15 a nih thu sawiin, "Huan neituten February 28 hmain mei kawng ṭha tak an sial hnuah an hal ngei tur a ni. Boruak ṭha siamtu leh chakkhai mamawh chi hrang hrang hman tur min petu ramngaw uluk taka enkawl chu khua leh tui ṭhate bat a ni a, inelna rilru pu miah lo pawhin ram kang ven leh tikang lo tura hmalak chu mi tin mawhphurhna a ni," a ti.

Mipuite hnenah a tam thei ang ber zirtirna pek a pawimawhzia sawiin Siaha DC chuan, "Department mal hmalak theihna a nih loh avangin tlawmngai pawl leh khawtlang hruaitute nen pheikhai rual taka hmalak ho a pawimawh. Inzirtirna pawh a tam thei ang ber buatsaih ṭha. Mipuite hnena zirtirna pek chu pek tawh a awm thei lo. Hriatsa inhrilhnawn fo pawh a sawt hle," a ti a, committee member-te pawh mahni zawn ṭheuhah ramkang ven kawngah midang zirtirtu ni turin a sawm.

Ṭhutkhawmnaa rel a nih dan chuan Siaha district-ah hian Kangmei Ven Hapta hawnna hun chu February 14, zing dar 7:30-ah Forest Conference Hall, MADC-ah hman nise tih a ni.