Lunglei buaina party inbeihna atana hman ni lo se - HM Zira

Home minister R Lalzirliana chuan, Lunglei District Court beih a ni leh magistrate quarters suasam a ni chu political party inbeihna atan hman ni lo se a duh thu a sawi.

Home Minister hian nimin khan a pisaah thu-chah sawiin, "Thil duh-awm lo thleng palhte party inbeihna hmanrua atan hmang loin, Mizo mipuite'n Lunglei mipui mangang thlavang hauhsak a ngai zawk a ni," a ti.

R Lalzirliana chuan, MNF president Zoram-thanga'n Lungleia thil thleng hi sorkar laipui thlen a tum thu a sawi tih tarlangin, "Mizo nationalism-a chiang nia insawi ṭhinin Lunglei district mipui thlavâng hauhna pakhat mah a nei lo hi mak ka ti hle," a ti a; misual ṭhenkhat thil tih remchanga hmanga phí buaiah Zoramthanga a puh.

Democracy lungthu pathum zinga pakhata a awm loh chuan demo-cracy a khingbái tih sawiin R Lalzirliana chuan, "Lunglei District Court hna thawk thei loa siam a nih chuan Lunglei district mipui tan an fundamental right lak bosak ang a ni dawn," a ti a; Lungleiah Court dah leh thuai a nih thei nan sorkarin hma a lak mek thu a sawi.

Home Minister chuan, mihring 1,61,428 (2011 chhiarpui angin) chenna chu sorkarin a ngai pawimawh lo thei lo tih sawiin, "Mi tlemtê thil sual tih vanga mipui nuai hnih dawn lai harsatna siamsak hi sorkarin ṭha a ti lo," a ti.