Vanglaini zirchianna: Rules leh Valuation Committee tel loin Stamp duty lâkna dan thar hman a ni

The Indian Stamp (Mizoram Amendment) Act, 2016 chu Rules siam a nih hma leh ram hlutna chhût dan tur duang tur, Valuation Committee din a nih hmain hman ṭan a ni a; dan thar hnuaiah hian stamp duty chu a lêt thumin a pung.

The Indian Stamp Act chu Mizoramah siam remin kum 1997
aṭangin The Indian Stamp (Mizoram Amendment) Act, 1996 hman ṭan a ni a; he dan hi kum 2007 khan tihdanglam niin, stamp duty atan ram hlutna (market value) aṭanga chhûta 0.5% lak a ni ṭhin. Dan hi tihdanglam leh niin, Assembly chuan The Indian Stamp (Mizoram Amendment) Act, 2016 chu March, 2016 khan a pawm a ni.

The Indian Stamp (Mizoram Amendment) Act, 2016 atana Rules duan chhin, Draft Rules chu Council of Ministers chuan September 21, 2016 khan an pawm. Land Revenue & Settlement department aṭanga thu dawn danin, Rules hi Council of Ministers-in pawm mah se, notification tihchhuah a la ni lo.

Hetih lai hian, dan thar hi September 1, 2016 aṭanga hman ṭan turin gazette chhuah a ni a, mahse, department chuan chhiah lak tur punna a tam avangin an hmang lawk lo a, tun hnai aṭang khan an hmang ṭan. Dan siamṭhat tak ang chuan, stamp duty atana market value aṭanga 0.5 lak ṭhin chu 2%-ah tihpun a ni a, a lêt thumin a pung a ni.

Sorkarin April 18, 2016-a notifi-cation a tihchhuaha a lan dan chuan, dan thar hmang tur hian ram hlutna chhût dan tur ngaihtuahtu Valua-tion Committee din tur a ni a; Committee-ah hian Inspector General of Registration and Commissioner of Stamps ruat tur a ni. Valuation Committee hnuaiah hian district leh sub-district tinah Market Valuation Sub Committee din tur a ni.

Inspector General of Registration and Commissioner of Stamps atan hian Land Revenue & Settlement Director chu a thuphunga ruat a ni tawh a, mahse, notifica-tion tihchhuah a la ni lo.

September 21, 2016-a Council of Ministers meeting-in The Indian Stamp Act atana Draft Rules an pawm tâkah chuan, Valuation Committee turte tarlan a ni a, notification erawh tihchhuah a la ni lo.

Land Revenue & Settlement department aṭanga thu dawn danin, Valuation Committee din a la nih loh avang hian tun dinhmunah chuan stamp duty hi ram hralh a nih chuan a leina zat aṭanga chhût a ni a, ram inpekah chuan Land Revenue & Settle-ment-in ram hlutna an neih aṭanga chhût niin, loan laknaah chuan loan lak zat tur aṭanga chhût a ni. Ram inrochunah erawh stamp duty a ngai lo.

Stamp duty atana dan thar hman a nih thu hi mipuiin an la hriat loh avangin, Notary Public hnena stamp duty la tura kalte chuan an rin aia tam sum an sen a ngaih ṭhin avangin an la thei ṭhin lo nia thu dawn a ni.