Aizawlah World Heart Day hman a ni

Nimin khan Tourist Lodge, Chal­tlangah National Programme for Pre­vention & Control of Cancer, Diabetes, Cardiovascular Diseases & Stroke (NPCDCS) huaihawtin Mizorama a vawi khat nan World Heart Day hman a ni a, Health secretary Lalrinliana Fanai khuallian a ni.

Lalrinliana Fanai chuan, inkai chhawn theih loh natna, non communicable disease (NCD)-te chu sorkarin laipuiin a vei thu sawiin, NCD bakah, mitdelna, bengngawnna leh rilru hriselna lamahte huang a zauh zel thu a sawi a; heng natnate atan hian North Eastern Council aṭangin ṭanpuina dawn a nih thu a sawi.

World Heart Day hmannaah hian Health principal director Dr K Ropari'n inlawmna thu a sawi a; Aizawl Civil Hospital-a cardiologist Dr Loncy V Lalzarliana'n lung (heart) natna, a awmtirtu leh invennate a sawi a, NPCDCS state nodal officer Dr Eric Zomawia'n inkai chhawn theih loh natnate leh nunphung hrisel zawk neih dan tur a sawi thung.

World Heart Day hi World Heart Federation hmalaknain kum 2000 aṭangin kum tin September 29-ah hman a ni ṭhin a, lung natna leh a kaihhnawih (stroke)-te chu nunna latu tam ber a ni tawh tih hi mipuite hrilhhriatna atan hman a ni ṭhin. Lung natna thlentu langsar zualte chu - vaihlo tih nasat, awm âwl lutuk, ei leh in hrisel lo tih leh zu in nasatte a nih thu an sawi. Day hmannaah hian Hrangbana College leh Chaltlang Higher Secondary School zirlaite an tel.

NCD Clinic aṭangin kum 2015-16 chhung khan mi 85,710 en zingah mi 9,666 (11.2%)-in zunthlum an vei a, mi 12,904 (15%)-in BP sang an nei tih hmuhchhuah a ni. Mi 673-in lung natna leh a kaihhnawih an nei tih hriat chhuah a ni bawk. Kum 2015-16 vek khan NPCDCS chuan khua/veng hrang hrangah ṭum 63 awareness campaign an nei.