KHAWTHLIR

Chhui tan

Lungleia buaina thleng chhui tura ruat, Aizawl DC Kannan Gopinathan chuan nimin khan Lunglei a thleng a, Lunglei DCcharge la mektu Lawngtlai Dr. A Muthamma kawm nghalin, hemi hnu hian Lunglei District Session Court tlawhin, thil tihchhiat hrang hrangte a enfiah. Tlaiah thil chhuina atana hriat ṭulte mi hrang hreng a zawtfiah.

In kâng

Nimin chhun dar 12 vel khan Champhai Zotlanga H Lalthangluaia te in a kâng a, bungrua chuh hman lohin a kâng ral. Thu dawn danin, H Thangluaia te in hi Assam type chhawng hnih a ni a, kângmei chhuah laiin inah awm an awm loh avangin a kan chhan hriat a ni lo.

Thiin chhar

Nimin chawhma dar 10 vel khan Luangmual Vengthlanga luikawrah Lalkaisanga (43) chu thia hmuh a ni a, amaha chesual a nih rin a ni. A ruang hi Aizawl Civil Hospital-ah endik a ni.

Thisen pe

Saitual College-a NSS leh Red Ribbon Club-te chuan, September 28, 2016 khan an college-ah blood donation camp an huaihawt a, Aizawl Civil Hospital tan mipa 88 leh hmeichhe 25-te'n thisen unit 113 an pe.

Lehkhabu tlangzarh

V Rokhawliana, Lunglei Venglai lehkhabu ziah, 'Partei zûn kara ro thuhruk' tih chu nimin khan Lunglei sub-headquarters YMA conference hall-ah Lunglei HPC vice chairman S Laldingliana'n a tlangzarh. He thawnthu hian Art & Culture, MAL leh NEZCC (Dimapur)-te'n Mizoram huapa thawnthu inziahsiak buatsaihah lawmman pakhatna a dawng a ni.

Rualbanlote sem

Central National Institute for the Mentally Handicapped (NIMH), Secunderbad, Social Welfare Department leh SSA Mission, Aizawl district ṭangkawp chuan nimin khan Central YMA Hall-ah khan rualbanlote hnenah an zirnaa ṭangkai tur teaching learning material kit an sem.