Lunglei ngaihthahah sorkar hotute puh

MNF sub-headquarters, Lungleia Legal Board hruaitute chuan nimin khan Lungleia Mizo Hnam Rûnah thuthar thehdarhtute kâwmin, Lunglei chu thuneitute'n an ngaihthah nia an hriat thu an sawi.

Lunglei MNF Legal Board chairman F Robert Hmingthansanga chuan, September 22, 2016-a Zohnuai mi ṭhenkhatin Lunglei District Court building an khawih leh Judicial quarters an suasam chungchangah, "Lunglei chhung-a harsatna thlengah Zohnuai mipuite'n sorkara lungawi lohna an neih-te an lantir thiang a, mahse, thil pawi thleng lo turin sorkarin dan leh thupek a kengkawh zo tur a ni," a ti.

Lunglei MNF Legal Board-te chuan, Lungleiin harsatna an tawh chu Mizoram sorkarin dan leh thupek a kenkawh zawh loh vangah an puh a; thil thleng chungchangah, Gauhati High Court Chief Justice-in lehkha a rawn thawn anga Lal Thanhawla kaihhruai sorkarin chak taka hma an lak loh chuan a ṭul anga hmalak an tum thu an puang a ni.

Lunglei MNF Legal Board chuan, Lungleia buainaah mawh la ngam loa sorkar official-te mawhphurhtir tumah CM Lal Thanhawla leh Home minister R Lalzirliana an puh a; Lunglei district-a Congress MLA pasarihte'n Lunglei dfistrict mipuite thlamuanna tura aw an chhuah lo chu mak an tih thu an sawi bawk.