Mizoramah thla 3 chhungin TB vangin mi 12 an thi

Nimin khan IPR Conference Hall-ah Revised National TB Control Programme (RNTCP) hnuaia hmalaknate thlirletna, 2nd. Quarter Review Meeting 2016 neih a ni a, Health Services director Dr Rohmingthanga Ralte-in a ho. He hunah hian kumin April-June chhungin Mizoramah TB vei mi 609 hmuhchhuah a ni a, TB vangin mi 12 an thi tih an tarlang.

Meeting-ah hian nikum leh kumina thla thum, April-June thla chhunga ngawr (TB) vei dinhmun khaikhin a ni a; April-June 2016 chhung khan Mizoramah TB vei nia rinhlelh mi
2,214 endik niin, chu'ng zinga mi 609 chuan TB an vei tih hmuhchhuah a ni a, TB vanga thi mi 12 an awm.

TB leh HIV vei kawp mi 64 enkawl an ni a, TB khirh zual MDR-TB vei mi 12 enkawl niin, TB vei enkawl zinga 93% chu an dam leh a ni.

Dr Rohmingthanga Ralte chuan, hriselna lama inzirtirna pek uar a pawi-mawh thu sawiin, ngawr natna leh natna dang laka mipui an him theih nan nun dan phung leh faina kawngah hmasawn a ngai a, uar leh-zuala inzirtirna kalpui a ṭul thu a sawi a; health programme-a thawk zawng zawng, health worker leh ASHA thlengin ṭhahnemngai lehzuala thawh a ṭul thu a sawi bawk.