Covid-19 la positive chunga chhuahtirin nghawng a nei zel

September 20, Pathiannia Covid-19 vei zing hmuh chhuah zinga Durtlang Leitan mi palite chu Mizoram chhunga kai chhâwng an ni a; anni hi Covid-19 la vei (positive) chunga September 1, 2020-a mi pariat chhuahtirte kaihhnawiha hripui kai an nia hriat a ni.

Vanglaini palai zawhna chhánga Durtlang Leitan Local Task Force hruaitute sawi danin, an venga Covid-19 vei hmuh chhuah thar palite chu inchhungkhat vek an ni. September 1, 2020-a ITI Venga CCC aṭanga Covid-19 positive la ni chunga mi pariat chhuahtir zingah Durtlang Leitan mi pakhat telin, an inah zan khat a riak hman a; chumi kal zelah chuan hripui vei hmuh thar mi palite chu an swab sample endik a ni.

Sorkar thuchhuakah Durtlang Leitana Covid-19 positive hmuh thar pali zinga pahnihin symptom an nei anga tarlan a nih laiin, symptom nei an awm loh thu, LTF hruaitute chuan an sawi.