Hnahthial College-ah Geography Zirtirtu nghet dah turin sorkar an phût

Hnahthial College Students Union chuan, an college-ah Geography zirtirtu nghet pahnih dah tura Finance department-in a remtih tawh angin, Geography zirtirtu nghet (regular) dah thuai turin sorkar an ngen a; October thla chawlhkar khatna tawp thlenga thu lawm-awm an dawn loh chuan na zawka sorkar nawr an tum thu an puang.

Hnahthial College SU hruaitute hian nimin khan Aizawl Press Club-ah thuthar thehdarhtute kâwmin, an college-in harsatna a neihte an sawi a; 'Finance department-in a phal tawh, tun thlenga lecturer nghet min la pe lo hi Hnahthial khawtlang zirlaite'n kan hrethiam lo a, a hlawhtlinna kan hmuh mai loh chuan a tàwp thlenga hmalak kan tum," an ti.

Hnahthial College SU hruaitute sawi danin, an college hi kum 1979-a din a ni a, a din tirh aṭang-in subject paruk a awm. Mamawh nia an inhriat avangin private-in Geography department an hawn belh a, MLA fund aṭangtein Geugraphy zirtirtute lawmman pek ṭhin a ni. Kum 2013-ah Mizoram sorkarin Geography department atan permission a pe a, zirtirtu guest lecturer pathum a pe tel nghal.

Mizoram University-in Hnahthial College chu kum 2014-ah an endik a, Geography-ah university norms angin zirtirtu a ngheta thawk an awm loh avangin MZU chuan kum 2015-16 aṭangin Geography chu a tihtawpsak. Chumi hnuah zirtirtu nghet dah turin Mizoram sorkarah an dil a, Mizoram sorkara Finance department pawhin kum 2015 khan Geography zirtirtu nghet (regular) pahnih lak phalna a pe a ni.

Finance department-in kum 2015-a Geography zirtirtu pahnih lak a phalsak tawh mah se, tun thlengin dah a la ni lo tih sawiin, Hnahthial College SU hruaitute chuan, hriatthiam harsa an tih thu an sawi a, "Kan harsatna hi a rang lama min chinfelsak turin sorkar kan ngen a ni," an ti.

Zawhna chhangin, sorkar an ngennaah hian October chawlhkar hmasa ber thleng sorkar an ngaichâng dawn a, chumi chhunga thu lawm-awm an dawn loh chuan lungawi lohna lantir an tum thu leh, academic session 2017-18 ṭan tirh aṭangin Geography zirtirtu nghet neih ngei an phût thu an sawi.

An sawi danin, Hnahthial college-ah hian zirlai 127 an awm mek a; Geography (core) bikah zirlai pariat an awm a, MZU-in kum 2015-ah a tihtawpsak avangin 2015 aṭangin Geography-ah zirlai thar lak a ni tawh lo.