KHAWTHLIR

Lunglei DC chuan thupek chhuahin, Lunglei Kàwmzáwla Assam Rifles camp-a awm zinga mi 17-in Covid-19 an vei tih hmuh chhuah a nih avangin, camp chu luh leh chhuah phal lohna hmun, containment area-ah a puang. Con­tain­ment area-ah hian DC-in phalna a pek te, medical duty, security duty leh duty pawimawh nei tura ruatte tih loh chu luh leh chhuah phal a ni lo.

Champhai DLAO conference hall-ah nimin khan East Tuipui bial chhunga VC executive body tharte pualin training buatsaih a ni. DLAO Esther Leihang chuan, VC Court chu sorkar rorelna hniam ber a nih loh thu leh sorkar rorelna inṭanna a nih thu a sawiin, “A bul ṭanna a dik loh chuan sorkar a kal dik theih lo a, rorelna inṭanna VC hi a pawimawh hle a ni,” a ti. Training-ah hian Mizoram Finance Commission 2019-20 aṭanga work order first instalment sem a ni a, East Tuipui biala VC 25 hnenah Rs. 23,63,427 sem chhuah a ni.

BJP, Mizoram Pradesh ṭhalaite chuan thuchhuah siamin, Hamsapara camp, Tripura-a a awm Bru mi ṭhenkhatin Zawlnuam Vengpui VTF vènbûk/duty post, Mok káia mi September 20, 2020-a an hâl chu pawi an tih thu leh an dem thu an tarlang. BJP ṭhalai chuan, "Kan frontline worker-te venbûk an hâl chhia hi Mizo mipui zah lohna leh tham lohnaah kan ngai. Pawi khawihtute hi a rang thei ang bera zawng chhuak a, an phu tâwk hrem ngei turin Mizoram sorkar kan phût," an ti.

State Referral Hospital (ZMC)-ah Covid-19 vei vangin mi 67 enkawl mek an ni a, Isolation Ward-ah mi 66 leh SICU-ah mi pakhat an awm. SRH-ZMC Bulletin tarlan danin, Isolation ward-a awm zinga pahnihin khawsik an nei a, khuh leh hrawk báwr nuam lo an awm bawk. SICU-a awmin harsatna a nei lo