BJP-in Farms Bill an sawifiah; Hma la turin Mizoram sorkar an phût

BJP, Mizoram Pradesh president Vanlalhmuaka chuan nimin khan Aizawl Press Club-ah thuthar thehdarhtute an kâwm a; tun hnaia Parliament-a pawm tâk, Farms Bill, 2020 a sawifiah. Farms Bill chu a rang lama Mizorama hman a nih theih nan hma la turin Mizoram sorkar a phût.

Mizoram BJP President chuan, prime minister Narendra Modi hmalakna hnuaiah kut hnathawktute hamṭhatna tur leh nuam zawka an nun a, thlai tharte ṭha zawka state chhung leh páwna an hralh theih nan Farm Bills, 2020 - The Farmers (Empowerment and Protection) Agreement of Price Assuarance and Firm Service Bill, 2020 leh The Farmers Produce Trade and Commerce (Promotion and felicitation) Bill, 2020 pass a ni chu lawmawm an tih thu a sawi.

Bill pass a nih avangin loneitute'n an thlai tharte hlâwk zawkin ram chhung an duhna apiangah an hralh thei dawn tih sawiin Vanlalhmuaka chuan, "Farm Bills, 2020 hi Mizoram sorkar pawhin kut hnathawktute hmakhua ngaiin, Mizorama kut hnathawktute'n a taka an chhawr theih ngei nan leh loneitute Cachar syndicate-te'n an duh duha an nghaisak tawh lohna turin a ṭul anga dan siama bawhzui nghal turin Mizoram sorkar kan ngen a ni," a ti.

Mizoram BJP President chuan, Farm Bills, 2020 hi eptu party pawhin an election manifesto-ah an telh thu sawiin, "Chutiang ti thei tura India mipuite rin tâwkna an election hmanga an chan theih tak loh avangin an sawisel mai niin kan ngai," a ti a; Farm Bills, 2020 chuan loneitute hamṭhatna tur leh hmasawnna tur rahbi thar a siamsak dawn thu a sawi.

    Mahni state chhung leh inter-state chhungah kut hnathawktute thlai thar chhuah hralh leh leia harsatna awm ṭhin tihbo.

    Kut hnathawktute'n anmahni duh thu ngeiin an thlai thar hralh chungchangah zalenna an nei tawh ang. Wholesale, company lian, retail, etc. dawr chungchangah farmer-te'n middleman ngai loin sumdawnna an kalpui thei tawh ang.

    Market support price (MSP) chu a hma ang chiahin kalpui a ni ang a, tihtawp/tihdanglam a ni lo ang. Farmer-te'n an thlai thar hralhna kawnga MSP emaw a rate sang zawka thlai thar lei leh hralh chu an zalenna a ni ang.

    Farmer-te thlai thar chhuah hralhna atan Agri Online Platform uar deuh deuh a ni ang. E-Nam trading system pawh Mandis-ah a ngai anga kalpui a ni ang. Hei pawh hi kut hnathawktute zalennaah a dah.

    Loneitute hamṭhatna turin an thlai chìn hma aṭangin an hralhna tur rate hre sain - mimal, company, wholesaler, processing unit, cold storage, farmgate, etc. nen agreement/contract an siam ang.

    Loneitute'n an mahni duh thuin an thlai thar an hralh thei mai ni loin, hralhna man chu ni thum chhungin an hmu vek tawh ang.

    Agriculture produce marketing committee (AMPC) chuan state chhunga loneitute thlai thar chu leiin, commission awmin an hralh chhâwng ṭhin. State páwn leh chhunga thlai thar hralh leh lei chungchangah phalna leh khapna pe theitu niin, harsatna tam tak an siam ṭhin.

    Loneitute'n thlai thar an thar chhuahna kawng emaw, hralhna kawnga chhiah vanga harsatna awm ṭhin chu Farm Bill, 2020 hian nasa taka sukiangin, loneitute tan thawvenna nasa tak a pe ang.