Assembly emergency session a tiak. Lirthei chhiah pekna dan tidanglam

Mizoram Assembly emergency session, ni hnih awh chu nimin khan chhunzawm a ni a, chhun dar 12:10-ah tihtawp a ni. Nimina session-ah hian 'The Mizoram Motor Vehicles Taxation (Ammendment) Bill pass a ni.

The Mizoram Motor Vehicles Taxation (Ammendment) Bill pu luttu, Transport minister John Rotluangliana chuan, The Mizoram Motor Vehicles Taxation Bill chu July 2015-ah Assembly House-ah pass a ni a, February 8, 2016-ah hman ṭan a nih thu a sawi a, "Commercial Vehicle Joint Action Committee-in vawi khata lirthei chhiah pek tlak chu an tlin loh thu leh instalment-a pek an duh thu an rawn thlen a, an duh dan zûl zuiin instalment-a pek turin ruahman a ni," a ti.

Amendment bill sawihonaah hian eptu MLA-te chuan bill siamṭhat a ni chu ṭha an tih thu te, sumdawnna lirthei ni lo tan pawh instalment-a chhiah pek phal ve ni se an duh thu te, taxi chauh ni lo mimal lirtheite pawh intlan chhâwktir ve an duh thute leh, kum 15 atana chhiah pek chu rei lutuk an tih thute sawi.

Nimin session-ah hian The Twenty Fourth Annual Report of 2014-2015 of Mizoram Public Service Commission, The Mizoram Entry Tax Rules 2015, Report of The Comptroller and Auditor General of India on General, Social, Economic, Revenue and Economic (PSUs) Sector for the Year Ended 31 March 2015 leh, Annual Technical Inspection Report on Rural Local Bodies and Urban Local Body for the Year ended 31 March 2015-te pharh a ni.

Parliament in pahnihin Good & Service Tax (GST) hman tura a pawm tak avangin India danpui tihdanglam a ngai dawn a, danpui tidanglam tur chuan state leh union territory zatve talin an pawmpui a ngai. Finance Ministry chuan state leh UT-te pawmpuina a rang lama an duh avangin Mizoram Assembly emergency session hi neih a ni.

GST hi April 1, 2017 aṭangin India ram pumah hman ṭan tum a ni a, hman a nih hun chuan state sorkar dan anga chhiah an lak hrang hrangte pawh tihtawp a ni dawn a, India ram pumah ang khatin chhiah lak a ni tawh ang.

Taxation department hotute chuan, GST hman a nih chuan Mizoramin chhiah a hmuh ṭhin a pun an beisei thu an sawi.

Ni hnih awh Assembly session-ah hian paper pasarih pharh a nih bakah, Assembly hnuaia Committee hrang hrangin report pali an thehlut a ni.

Speaker Hiphei sawi danin, 7th Mizoram State Legislative Assembly hnuaiah hian House-ah bill 37 a lut tawh.