KHAWTHLIR

Thisen pe

Mizoram Bible College, Aizawl chuan an din champha vawi 9-na pualin nimin khan an college-ah blood donation camp an huaihawt a, Aizawl Civil Hospital tan mipa 21 leh hmeichhia pahnihte'n thisen unit 23 an pe.

COTPA bawhzui

Aizawl District Anti Tobacco Squad chuan, nimin khan Ngaizela maxi-cab dinna leh city bus dinna bawr velah dan phal loha meizial zawrh leh puipunna hmuna mei zu an awm leh awm loh an enfiah. Aizawl ATS-te chuan, mihring phur chi lirtheiah passenger an neih laia meizûk phal loh a ni tih hriattirna tàr vek tur a nih thu an sawi.

Thil siam zirtir

NABARD Mizoram, World Vision India (Chhimtuipui Area Programme) leh KVK Lawngtlai ṭangkawp chuan nimin khan Carolyn Hotel, Lawngtlaiah Lawngtlai district-a self help group-te tan pickle leh balhla chip siam dan zirna an buatsaih a, mi ṭhahnem tak an tel.

STAM hruaitu

August 25 a Sciences Teacher's Association of Mizoram (STAM) hruaitu atana thlan chhuahte chuan August 30 khan nihna an in siamfel a, president-ah C Lalrosanga leh general secretary-ah Zothanliana te ruat an ni.

Adopted village

Johnson College chuan UGC duh dan angin, an college adopted village atan Maubuang an thlang. Adopted village puanna hun hi August 30, 2016 zan khan Maubuangah an hmang a, Johnson College hotute bakah, Maubuang khawtlang hruaitute an tel.