Social media hman dan tâwk thiam turin Zodintluanga'n zirlaite chah

Minister Zodintluanga chuan nimin khan Vanapa Hall-ah Hrangbana College Annual Week 2016 kharna inkhawm a hmanpui a; "Facebook leh Whatsapp a lâr em em a, hengte hi kan zirlaiah a tel hauh lo thung," tiin, zirlaite chu social media hman dan tawk thiam turin a chah.

Zodintluanga chuan, zirlaite tan ngaihtuah tur bik a awm thu sawiin, "Kan zirna theihnghilh leh ngaihthah khawpa Whatsapp leh Facebook-te khawih lo turin ka chah che u a ni," a ti a; zirna lama mi hlawhtlingte chu thiam thei fál ni loin tumruh, hrât leh taima an nih thu leh nu leh pate thuawih bakah, chhungkaw khawsak mila khawsa thiamte an nih thu a sawi.

Zirlaite chu tuarchhel tur leh taima tura chahin, lehkha zir nasa apiang an hlawhtling ṭhin tih sawiin, Minister chuan, "Kan zirlai zir ṭhat hi kan mawhphurhna a ni. Sorkarin zirna in ṭha min pe a, nu leh pate'n thingtlang mite ngat phei chu káwla ni chhuak chhiara fehin min châwm a, society-in min hrethiamin min âwl ṭhin bawk. Hengte zawng zawng kan rulh letna tur chu kan zirlai kan tih ṭhat a ni," a ti.

Minister chuan, zirlaite chu an syllabus chhunga lehkhabu chhiar tur awm angte chhiar tam turin a chah a, "Zirlaite hian chanchin tharte pawh kan hriata kan ngaihven a ngai. Chanchinbu a lo thlenin, phek hnung leh
ṭhalai huang vel chhiara duhtâwk mai loin, phek hma headline-te chhiara article section-te chhiar hram hram tum tur a ni," a ti. Lehkhabu chhiar uar tur leh kum khatah lehkhabu pakhat tal chhiar tum turin a fuih.

College zirlaite chu vote thlak rual an nih tawh avangin politics ngaihven tura chahin, Zodintluanga chuan, "India dan hnuaia vote thlak rual kan ni tawh a, mi puitling, a chhia leh a ṭha hre rual kan ni tawh. Politics kan ngaihven ve a ngai a, kan chhehvela thil che vel leh keimahni min nghawngtu politics hi kan hriat ve a ṭul. Mahni chhia leh ṭha hriatna hmangin a ṭha leh dika kan hriat kan thlang ngam tawh tur a ni," a ti.

Zodintluanga chuan, Mizoram sorkarin Dinthar Primary School awmna ṭhina IAS Coaching Academy a din chu hmang ṭangkai turin zirlaite a chah a, "Mi zawng zawngin IAS, IPS, IRS-te kan phâk lo a nih pawhin, SSC hi a ṭha em em a, Central office pawimawh leh NEC-ahte an ṭangkai em em a, he lam kan hawi tam a ngai a ni," a ti. Tuna zirlaite kutah ram enkawl hna a la awm dawn tih sawiin, zirlaite chu lo inpuahchah lâwk turin a chah bawk.