Vanduaina tàwkte chhawmdawlna pe

Aizawl District Legal Services Authority chuan, nimin khan Aijal Club-ah vanduaina tâwkte hnenah chhawmdawlna an hlan a, Law & Judicial minister Lalsawta'n a hmanpui.

Lalsawta chuan, vanduaina tâwkte sorkarin a chhawmdawlna a pe chu thil lawmawm tak a nih thu sawiin, "Neih fo ngai lo se a duhawm. Sualna leh vanduainate hi khawvel awm chhung chuan a bo tak tak a beiseiawm lo a, vanduaina tawkte, mi harsa leh rethei zawkte an nih phei chuan a tisualtu lamin vaubetin FIR thehluh tawhte pawh la let leh duh hial tih thâwm pawh hriat a ni ṭhin," a ti a; ṭanpuitu nei lo ang hiala inngaih tur a nih loh thu a sawi.

Vanduaina tâwktu leh humsual dáia harsatna tawkte'n sorkarah chhantu Law & Judicial department an nei tih sawiin Lalsawta chuan, "Dikna a dingchang zel ang. Mi tu pawhin vanduaina an tawhin hmasa berin police-ah FIR thehluh a ngai a, chumi hnu thla ruk ral hmain Mizoram State Legal Services Authority-ah thlen tur a ni," a ti.

Vanduai tawktu ni-mina chhawmdawlna pek hi mi 14 an ni a, an zingah Rs. 1,50,000 dawngte pawh an awm a ni.

Inkhawma tarlan dan-in, vanduaina tâwk an awm chuan Mizoram State Legal Services Authority-ah office hun chhunga biak theih reng an ni a; a tuartu chu naupang kum 14 hnuai lam a nih chuan ṭanpuina chu 50%-in a pun theih dan a awm a, thil sual titu hriat ni lo mahse a tawrhna avangin zangnadawmna pek theih a ni.