Scholarship dil dan inhrilhfiah

Minority scholarship leh tribal scholarship dil tur zirlaite'n online application hmanga an dil a ngaih dawn avangin, zirlaite leh nu leh pate'n harsatna an tawh loh nan nimin khan Mizoram Scholarship Board (MSB)-in Electric Veng YMA Hall-ah inhrilhfiahna hun an buatsaih a; Aizawl district-a sorkar zirna in aiawhte an tel.

MSB secretary JH Zoremthanga chuan, zirlaite'n a hun taka scholarship an dawn theihna turin scholarship dil dan kalphung inhrilhfiahna buatsaih a ni thu a sawi a, scholarship dil turte'n an bank account number leh IFS code-te chiang taka an ziah a ngaih thu sawiin, "Headmaster leh principal-te'n zirlaite'n scholarship an dilna an endik leh vek tur a nih avangin, a dik lo awm palh theiah mawhphurhna sang tak an nei a ni," a ti.

Sorkar laipui ruahmanna thar angin, kuminah National Scholarship Portal -2 hnuaia scheme 39 awmah zirlaite tan scholarship dil theih a ni dawn a; Mizoramah chuan minority scholarship leh tribal scholarship dil theih niin, zirlaite'n bank-ah account an hawng tur a ni.