AMC chawk buaiah state sorkar puh

MNF party chuan thuchhuah siamin, Mizoram sorkar chu Aizawl Municipal Corporation (AMC) sorkar chawk buaiah an puh.

MNF chuan, August 1, 2016 aṭangin Mizoram sorkarin AMC chu Aizawla chengte tan nau piang leh mitthi chhinchhiah hna (Birth and Death certificate registration) a pe thar tih sawiin, "AMC hnena sorkarin hna thawh tur pe siin, registration fee chu Mizoram sorkara lo buaipui ṭhintu Economics & Statistics account-a chhûng lut turin a ti leh si. AMC sorkarin phûr taka thawk tura a inbuatsaih laia fee tlemtê pawh sorkarin a chuh leh tlat si hi AMC sorkar chawhbuai-naah kan ngai," an ti.

AMC hnena hna thawh tur chiah pe a, a thawhna tur sum pe si lo leh fee lak khawmte pawh Mizoram sorkarin a chuh tlat chu an ngaihthiam loh thu sawiin, MNF chuan, Economics & Statistics account-a Birth & Death registration fee chhûng lut tura a tihna thupek chu sût turin Mizoram sorkar an phût a ni.

MNF chuan, North Eastern Region Urban Development Programme (NERUDP) leh Swach Bharat Mission aṭanga Aizawla bawlh-hlawh paih, sawngbawl hna leh in-thiarna siam hnaah Mizoram sorkarin a thawktu tur dik tak AMC thawhtir loin, SIPMIU din chawpin a thawhtir nia sawiin, an hriatthiam loh thu an sawi a; Aizawl hmasawnna tura hna hrang hrangte chu AMC thawh tir turin sorkar an ngen.

MNF thuchhuah chuan, "Sorkar laipuiin khawpui hmasawnna tura a ruahman, AMC hna thawh tura tihte Mizoram sorkarin a lo lambun fo hi AMC sorkar leh Aizawl mipui zahlohnaah kan ngai. Aizawl khawpui leh a chhunga chengte'n hma an sawn theih nan AMC hi a nihna tur ang thlapa kalpui kan duh," a ti.

Mizoram sorkarin kum 2015 inthlan dawnah AMC-a executive councillor awm chu an hamṭhatna leh enkawlna sum tam tham lo tak chu thîkin, Assembly-ah dan siamṭhain an paih vek niin an sawi a; ministry, parliamentary secretary leh MLA-te bakah, officer duat zualte hamṭhatna leh enkawlna sum sànzia state sorkarin a hmuh kân chu mak an tih thu an sawi bawk.