Nau piang leh mitthi chhinchhiah dan sawiho

Inter-Departmental Coordination Committee (IDCC) on Civil Registration System chu nimin khan Aijal Club-ah an ṭhukhawm a; Mizorama mi piang leh thi zat dik leh rintlak taka chhinchhiah a nih theih nana hna thawh dan te, harsatna tawhte leh a sutkian dan turte an sawho.

Meeting kaihruaitu, Planning secretary Dr C Vanlalramsanga chuan, birth and death registration-ah Mizoram chu state dangte nena khaikhinin thawk ṭha berte zinga mi a nih thu a sawi a, "Mawh--
phurtute thawhhona ṭhat vang a ni," a ti a; hmabak tam tak a la awm avangin thâ thlah loa fimkhur taka thawhhopuiah member-te chu a sáwm.

Mizoram Registration of Birth & Death (Amendment) Rules, 2015-in a tarlan danin, mi an pian emaw, an thih emaw aṭanga ni 1-21 chhungin tual-chhunga Registrar of Births & Deaths-ah inziah luh man chawi a ngai lo a; ni 22–30 chhunga inziah luh chuan certificate man Rs. 100 leh late fee Rs. 10 chawi a ngai. Ni 31 hnu lamah local registrar-ah inziah luh theih a ni tawh lo a, Additional Chief Registrar of Births & Deaths emaw, Assistant District Registrar of Births & Deaths pan a ngai tawh a, late fee Rs. 100 chawi a ngai bawk.

Pian/thih ni aṭanga kum khat hnu lama in register tur chuan awmna district-a judicial magistrate first class pan a ngaih bakah, late fee Rs. 1,000 chawi a ngai bawk a ni.