Naupang dikna chanvo inzirtir

Kolasib District Child Protection Unit (DCPU) chuan, nimin khan Kawnpuia Awithangpa Hall-ah leh Kawnpui Middle School-I ahte Juvenile Justice Act hnuaia naupangte dikna chanvo humhalhna dan leh, naupang dikna chanvo rahbehte chhanchhuah an nih theih dan tur zirtirtute leh zirlaite an hrilhfiah.

DCPU hotute chuan, JJ Act chu siam ṭhat a nih hnuah January 15, 2016 aṭangin hman ṭan a nih thu sawiin, "Integrated Child Development Scheme hnuaiah naupangin an dikna chanvo an chan ngei theih nan ram pumah hmalak mek a ni. JJ Act hian naupang kumtling lo, kum 18 hnuai lamte a huam vek a, kum 6-14 inkarte chuan Right to Education hnuaiah sikul an kai ngei a phût tlat a, zirtirtu, nu leh pate'n mawh an phur a ni," an ti.

DCPU hotute sawi danin, mipat hmei-chhiatna hman khawloh chungchangah inngaihdam tur a nih loh thu te, chhungkaw pangngai tak aṭanga sei len chu naupangte chanvo a nih thu te, an dikna chanvo hmu thei lo naupangte enkawl chhunzawm dante leh mimal pawhin enkawltu nihna an neih theih dante an sawifiah.

Tun dinhmunah Kolasib district chhungah naupang enkawlna home pathum a awm a, Audrine-ah naupang 34, Enna In-ah 17 leh Omega-ah 19 an awm mek a ni.