Bawngkawna thil thleng police-in sawifiah

Mizoram Police chuan thuchhuah siamin, September 20, Pathiannia Bawngkawna police leh truck driver inkara thil thleng an sawifiah a; police pahnih chawlhtir (suspend) a nih thu leh truck driver pakhat chu dan tlawhchhana hrem a nih thu an tarlang.

Police thuchhuah tarlan danin, September 20, 2020 chhun dar 12:30 velah truck MZ-04 3320 Ṭhuampui lam aṭanga tlân chuan Bawngkawn Sairang road péngṭhuama traffic point tlàn pelin Ramhlun lamah a tlân a; khawpui chhunga luh phal hun a nih loh avangin traffic police duty-te'n tihdin tumin hamrîk an hàm a, ding loa a tlân tlang avangin police-in an ûm zui nghal.

Truck chu Ramhlun North-a Industry Pêngah police dangin lo tidingin, Bawngkawn lamah an lêttir a, Bawngkawn a thlenin, traffic police duty-te'n thil awm dan sawipui an tum laiin inhmu thiam loin an inhnial a ni. Driver chuan, lockdown a nih avang leh Pathianni a nih avangin 'No entry' awm loa a ngaih thu te, police duty an awm loh thu leh police-te signal a hmuh loh thu te, hamrîk rî a hriat loh thute a sawi. A thil sawi chuan police duty-te a tilungawi lo hle.

An inhnial chungchang ngaihvenin a bul lawka Bawngkawn Police Station-a awm police (Aizawl DEF)-te an chho ve nghal tih tarlangin Police thuchhuah chuan, "An inhnial avangin police action duhawm lo tak a thleng ta a ni," a ti.

Thil thleng chungchangah hian police pahnih - Aizawl DEF leh Traffic unit-a mi pakhat ve ve suspend an ni tih tarlangin thuchhuah chuan, "Enquiry lak mek niin, departmental proceedings kalpui nghal a ni ang," a ti. Truck khalhtu chu DMR department-in thupek a chhuah te, Traffic SP-in thupek a chhuah leh, The Mizoram (Containment & Prevention of Covid-19) Ordinance 2020 tlawhchhanin hrem a ni tih a tarlang bawk.