MNYF chêt dan mipui hmangaih lohnaah MPYCC-in an ngai

Congress party ṭha­laite chuan thuchhuah siamin, MNF party ṭhalaite'n September 19, 2020-ah press con­ference nei a, mahni duh thua swab sample endiktir man sáng tak lâk chungchang sawifiah an lo tum ve chu mipui hmangaih loh thlâk hlea an ngaih thu an tarlang.

MPYCC chuan, "Hetianga pute thu hmu loa an lo ui ke tang râk ve mai mai laia Covid-19 Medical Operational Team-te'n rawtna ṭha, mipui tana hlâwk thlâk an lo siam daih hian MNF ṭhalaite hi inen lêt a ngaihzia a tarlang hle a ni," an ti.

Congress ṭhalaite chuan, swab test man tihniam turin sorkar an lo nawr tawh ṭhin tih sawiin, "Kan nawrna leh rawtnate bengkhawna Covid-19 Medical Operational Team-in Dt. 20/9/2020-a RT-PCR voluntary test man Rs. 2,500 leh RAT man Rs. 700 ni turin sorkarah an thlen dawn tih puanzar a ni ta hi lawmawm kan ti tak zet. MLA Dr Thiamsanga leh a committee member-te chungah lawmthu kan sawi a ni," an ti. Ruling an ni emaw, opposition an ni emaw pawh ni se, mipui dikna leh chanvo humhalhna hna an thawk reng dawn tih an sawi bawk.