MPC leh PRISM party-te Oct. 6-ah an inzawm dawn

22nd September, 2020

Mizorama political party pahnih - Mizoram People Conference (MPC) leh PRISM-te chu October 6, 2020-ah party pakhatah an inchhûn fin dawn.

Political party pakhata inchhûn fin chungchangah hian party pahnih hruaitute chu nimin khan MPC pisa, Treasury Square-ah an inhmu khawm a, Joint Meeting chairman R Zatawna'n a kaihruai. Meeting chuan, an inchhûn fin hun tur leh a hmun tur an ruat a, "MPC party leh Prism party Joint Committee Meeting chuan October 6, 2020-ah inchhûn finna programme hman ni se, tiin kan rêl," an ti.

Party pahnihte chuan, Aizawl Municipal Corporation (AMC) inthlanpui neih turah party pakhat angin AMC ward zawng zawngah candidate dah vek an tum thu an puang bawk.