Zawlnuama ramri vênbûk hâltute Mana hrem ngei turin sorkar phût
Zoram Peoples' Movement (ZPM) party chuan, Zawlnuam Vengpui VTF-te'n ramri venna atana vênbûk an siam hâltute chu a rang thei ang bera man a, an phû tâwka hrem tur leh, ramria duty-te hnenah ṭanpuina pe turin sorkar an phût.
ZPM chuan nimin khan thuchhuah siamin, September 20, Pathianni khan Mizoram leh Tripura inrinaa Zawlnuam Vengpui VTF-te duty-na venbûk chu Bru-te'n hâlin a kâng ral vek tih an tarlang a, "Kan ram chhung ngeia Tuikukin suahsual rawng an rawn báwl ngam reng hi ngaihzam mai mai chi niin kan ngai lo," an ti.
Bru nia hriatte'n Zawlnuam Vengpui VTF venbûk an hâl avanga thil duhawm lo zawk dang a thlen loh nan a rang thei ang bera hma la tura sorkar an phût thu sawiin ZPM chuan, "Tuikuk hoin an hâl chhiatna hmun Mok kàiah hian sorkarin duty-na hmun tur bûk a rang thei ang berin saksak ngei rawh se," an ti a; Covid-19 lêng laka mipui himna tura ramria duty-te hnenah ṭanpuina pe turin sorkar an phût a ni.
ZPM party chuan, mipui leh VTF duty-te thlamuan turin ramriah force mi duty tir ngei tura sorkar an phût thu sawiin, "Tuikukte'n an duh hun huna ramri kâna Mizoram an rawn lut a, pawi an rawn khawih ṭhin hi tihtawp a, pawi an khawih zel lohna turin sorkar hian sipai tam zawk dah ngei rawh se," an ti.
Mizoramah Chakma hoin ngampa taka Mizote kut an thlak ṭhin te, Bru-te an che fo te, social media-ah dâwt leh mawi lo taka Mizote an puhchhe ṭhin leh pawi an khawih ṭhinte chu tihtawp a nih theih nana hma la turin ZPM chuan sorkar an phût bawk.