Bawlhhlawh sâwngbâwl chungchang sawiho

Nimin khan Champhai DC Maria CT Zuali hoin IPR conference hall-ah khawpui thianghlim leh fai siam kawnga hmalakna tur, Champhai Solid Waste Management By-Law, 2020 chungchang sawiho a ni a, siamṭhat ngaite siamṭhat a nih hnuah an pawm a, hman theih tura hriattirna chhuah a nih hnuah hman ṭan a ni ang.

Maria CT Zuali chuan, bawlhhlawh paih fimkhur a ngaih thu sawiin, "Ṭawih thei leh thei lo thliar thiam a ngai a, faina kawnga ṭan la zel chungin khualzinte hîp thei turin faina kan nunpui a ngai. Green India Mission kaltlangin boruak hrisel leh thianghlim siam kawngah hmalak a ni a, dan siam thar chu a taka hman theih turin hriattirna chhuah vat a ni dawn a, mipui hnenah a zau thei ang bera zirtir a ni ang," a ti.

Ni tin khawsaknaah faina nunpui a ngai tih sawiin Champhai DC chuan, "A tìrah harsa mah se, tumna a awm phawt chuan tihlawhtlin theih ka beisei. Sorkar aṭanga hmalakna ngaihchan hmasak kher ngai loin mahni ṭheuhah bul kan ṭan thei a ni," a ti a; mimal anga inṭan, khawtlang leh ram pum thlenga faina nunpuia mi dang zirtirtu nih tum ṭheuh turin district mipui a chah.

Ṭhutkhawmah hian Champhai Solid Waste Manage­ment Bye-Law, 2020 hmanga a taka faina kawnga hmalaknate chak zawka kalpui dan tur sawiho a ni. Faina kawnga mipui mawhphurhna leh zawm turte enho a ni a, chhung tin aṭanga bawlhhlawh bakah, eizawn­na hrang hrang leh hmunhma dangte aṭanga bawlhhlawh khawn, paih leh sâwngbâwl kawnga man chawi ngai turte bithliah a ni.

Municipal Solid Waste Rules, 2016 zûlzuia duan Solid Waste Management Bye-Law, 2020 hmang hian Champhai khawpui a thianghlim theihna turin bawlhhlawh sakhat dah khawm, lâk khawm, sawngbawl, siam danglam leh tihral kawngah theihtawp chhuaha hmalak an tum a ni.