Sorkar hotute'n lei tawlh an tlawh Harsatna chinfel dan tur an enfiah

Hunthar Venga lei tawlhna hmun chu nimin khan sorkar hotute'n an tlawh a, harsatna chinfel dan tur an enfiah bakah, khawtlang hruaitute hnenah a ṭula hman tur ṭanpuina an pe.

UDPA minister Zodintluanga leh DMR minister C Ngunlianchunga chuan nimin khan Hunthar Veng hi an tlawh a; Zodintluanga chuan, Hunthar Vengin vanduaina an tawh chu sorkarin hrehawm a ti a, pawi a ti takzet tih sawiin, "Vanduaina tâwk chhungkuate ka tawrhpui tak zet a ni," a ti.

UDPA Minister chuan, leimin vanga in ṭhiah ngai leh in chhuahsante tan Basic Services to the Urban Poor (BSUP) Housing Project hnuaia in sakte luah theiha peih a nih tawh thu khawtlang hruaitute a hrilh a, a ṭula hman atan Rs. 10,000 a hlan nghal.

C Ngunlianchunga chuan, tih theih nei tam lo mah se, hmel tal inlan ṭhaa an hriat vanga kal an nih thu a sawi a, "Geological Survey of India (GSI) mithiamte'n naktuk hian survey an zo ang a, DPR-te siamin, helai hmuna leimin ṭhin tihreh a nih theih nan theihtawp chhuahin kan ûmzui dawn a ni," a ti.

DMR Minister hian a ṭula hman atan Hunthar Veng khawtlang hruaitute hnenah Rs. 10,000 leh DMR-in torchlight an neih thar chu hman turin a hlan.

Minister pahnihte ṭawiawmtu Aizawl DC office-a disaster management lam buaipuitute chuan, in chhe vek chhungkaw pariat hnenah sorkar aṭanga ṭanpuina awm thei Rs. Rs. 1,01,900 leh bungraw chhia chhungkaw paruk hnenah Rs. 3,800 an hlan a; in chhia leh bungraw dang chhia nei chhungkuate pawh zir chian an nih hnuah
ṭanpuina pek leh tum a ni.

Eptu MLA-te, Mizoram Democratic Alliance (MDA) Legislature Party member-te pawhin nimin khan an chairman Vanlalzawma hoin Hunthar Veng an tlawh a, khawtlang hruaitute hnenah a ṭul apianga hman atan Rs. 10,000 an hlan.

MDA secretary Lalruatkima chuan, Hunthar Veng vanduaina tawh chu tu'ma beisei lâwk loh thil a nih thu a sawiin, "Chhungkua buaina tâwkte kan tawrhpui a, khawtlang hruaitute leh sorkar pawhin vanduaina thlengah hian theihtawp an chhuah a, a lawmawm hle a ni," a ti.

Lalruatkima chuan, eptu MLA-te chuan tih theih nei tam lo mah se, mipuite harsatnaah theihtawp an chhuah tur thu a sawi a; an tih theih turah chuan inthlahrung hauh loa pun turin khawtlang hruaitute a chah.

Bialtu MLA Lal Thanzara pawhin nimin zing khan Hunthar Veng hi a tlawh a, hnatlangte thingpui lumna atan Rs. 20,000 leh an hnatlanna senso atan Rs. 10,000 a hlan.

Nimin khan hnatlan tum a nih avangin Lal Thanzara chuan DGP hnenah police-a disaster management lama thiam bikte thawh chhuahtir turin a ngen a; police-te pawh hnatlang turin an chhuak a, mahse, hnatlang chu ṭhulh a nih avangin an haw leh a ni.

Aizawl Municipal Councillor-te pawhin nimin khan Hunthar Venga leiminna hmun an tlawh a; mayor PC Lalhmingthanga chuan, leiminna hmuna leilâwn chhe siamna chu AMC lamin tum an inhuam thu a sawi.

Hunthar Venga leimin vang hian PHE tui semkualna a chhe vek a, PHE chuan hmun dangah tui pekna hmun tur an siam a, hmun pakhatah siam zo tawhin, hmun pakhat dangah an siam leh mek a ni.