Aadhaar card siam hna tan leh ta

Hun eng emaw chen Mizo-ramah Aadhaar siam hna thawh a nih loh hnuah, nimin aṭang khan Aizawl DC pisaah thawh ṭan leh a ni.

Thu dawn danin, biometric enrolment leh Aadhaar card atana thla lak hna thawktu, ECIL chuan Registrar General of India hnuaiah Aadhaar siamna atan nimin khan Aizawl DC pisaah hna an thawk ṭan a, thla latu mi pali an dah. Hna thawh ṭan lehna hi pilot project anga ṭan chhin a ni a, ni khatah mi 120 aia tam lo thla lak tum a ni.

Aizawl DC Office tarlan danin, Aizawl khawpuiah Aadhaar atana thla la la lo mi 2,60,000 vel an awm a; DC pisaah thla lak hna ṭan leh tawh mah se, hmunhma a zauh tawk loh avangin kar leh aṭangin Aizawla veng tinah thla la turin an kal kual dawn.

Biometric enrolment leh Aadhaar atana thla la tur hian Electoral Photo Identity Card (kum 18 tling lo tan ration card), bank passbook leh job card nei tan job card entir tur a ni.