Taxi an intlân chhâwk ṭan

Traffic Management Coordination Committee ruahman angin, nimin khan Aizawl khawpuiah taxi-te an intlân chhâwk ṭan a, intlân chhâwk duh loh vanga harsatna lian tham thleng hriat a ni lo.

Taxi intlan chhawk nan hian Aizawla taxi zawng zawngte chu hlawm pathum - A, B leh C-ah ṭhen an ni a, sorkar pisa chawlh ni leh Pathianni tih loh zawngah ni tin hlawm pahnih zel tlânin, hlawm khat an ding zel dawn.

Niminah chuan sticker A leh B-te an tlân a, C-te an châwl a; vawiinah B leh C an tlân ang a, B ho an châwl thung ang.

Traffic SP C Lalthanmawia hian intlân chhâwk hi taxi-te'n an zâwm ṭha hle tih sawiin, "Thu an awih viau a. Stricker bel loa tlân tlem azawng an awm a, sticker bel lo mante chu station lamah hruai niin, thil awmzia hrilhfiah an nih bakah, stric-ker pek nghal an ni," a ti.

Traffic SP sawi danin, Aizawlah taxi 3,525 a awm a; intlân chhâwkna thupek zawm lote chu MV Act Section 179 hmangin Rs. 500 chawitira hawtir zel theih an ni.

Hetih lai hian, Aizawl Taxi Workers Union tih invuahte chuan taxi intlân chhâwk an duh lo a, an lungawi lohna lantir nan nimin khan Chief Minister's Office thlangah an hruaitute an ṭhukhawm a ni.