MZP-in Mizote awmnaa Bru dah an duh lo

MZP chuan thuchhuah siamin, Bru-te Tripura-a an awm hlenna tura sorkar laipui, Tripura sorkar leh Mizoram sorkarte'n inremna thuthlung an ziak chu lawmawm an tih rualin, Tripura sorkarin Tuikukte inbenbelna hmun atan Mizote chenna Zampui tlangdung hman a tum chu an duh loh thu leh an dodal zel dawn thu an tarlang.

Bru-te chu an duh thu ngeia Mizoram chhuahsantu leh dâwta Mizoram hêk ṭhintu, khawvel hmaa Mizote puh hmingchhetute an ni tih sawiin MZP chuan, "Mizorama awm duh loin Tripura-a awmhmun khuar an duh zawk a, an duh ang ngeia Tripura-a inbéngbel tur an nih laia hmasang aṭanga Mizote luah ram, Zampui tlangdunga Tuikuk khaw thar din tumna a awm leh chhungkaw 6,000 chuang dah tuma hmalakna a awm hi a pawi hle," an ti.

MZP tarlan danin, kum 1998 khan hmasang aṭanga Zo fate luah ram, Mizo khaw pasarih chu Bru ho vangin Mizote'n an chán a; chu'ng khuate chu - Sakhan Serhmun, Sakhan Tualsen, Upper Dosda, Satnala, Sakhan Tlangsang, Bancherra leh Lungthirek-te a ni. Hei vang hian Zo fate luah chin ram chu Bru ho vangin chàn belh an remti tawh lo a, Zampui tlanga Bru khaw thar din tumna pawh a tàwp thlenga dosak zel an tum a ni.

Mizote chenna venghim turin an inpeih tih sawiin MZP chuan, "Zo fate luah chin ram chàn leh hi kan remti tawh lo. Mizote chîmral tuma hma latu Tripura sorkar hmalak mekna hnuhkir a nih theih nan hma la turin Mizoram sorkar leh thuneitute kan ngen a ni," an ti.