Aizawl solar street light tur hawn a ni

Aizawl Municipal Corporation (AMC) chuan, nimin khan Vanapa Hall-ah Aizawl khawpui veng hrang hranga solar street light phun tur hawnna inkhawm an buatsaih a, Aizawl mayor PC Lalhmingthanga'n a hawng. AMC-in tun hnaia India hmarchhaka khawpui fai ber chawi-mawina, 'Clean City Award' an lawm nghal.

Mayor PC Lalhming-thanga chuan, "AMC-in Aizawl mipui tan service
ṭha ber pek kan duh a, kan pe chho zel ang. Solar street light hi Aizawla kawtthlerte a ên ṭhat lehzualna atana AMC hmalakna a ni," a ti a; solar street light chu Aizawl mipuite'n ṭha an tih ngei an beisei thu a sawi.

PC Lalhmingthanga chuan, AMC-in khawpui hmasawnna hna a thawhna tur chi hrang hrangah Aizawl mipuite thawhpuiah sáwmin, kea kalna tur siamnaah a
ṭul dan anga mahni ram pawh pe phal turin mipui a ngen a, "Aizawl khawpui faina turin theihtawp kan chhuah zel dawn a, bawlhhlawh sawngbawlna buaipuitu SIPMIU lam pawhin an peih thuai kan beisei," a ti.

Solar street light supply-tu tur, Zoram Elec-trical Development Agency (ZEDA) director Lalrinmawia Ralte chuan, solar street light chu nizung chakna hmang tur a nih thu leh LED system hman a nih thu a sawi a, "Hrui a mamawh lo a, a man pek a ngai lo a, ni êng a hman avangin electric power a mamawh ve lo. Kum nga chhung ZEDA-in a enkawl dawn a ni," a ti.

ZEDA Director chuan, solar street light bun tur chu a himna ngaihtuahpui turin khawtlang hruaitute a ngen a; a bul hnaia bawlhhlawh paih lo tur leh zun khum lo turin mipuite a chah.