KHAWTHLIR

LIC Diamond Jubilee

Life Insurance Corporation of India chuan nimin khan an din champha vawi 60-na, Diamond Jubilee India ram pumah an lawm. LIC Aizawl Branch-a thawktute pawhin Zarkawta an pisaah an jubilee hi an lawm a, Central YMA Finance Secretary Lalrochuanga Pachuau chu khuallian niin Vanglaini editor K. Sapdanga chu khual zahawm a ni. LIC hian ram pumah Branch 2,048 a nei a, Zonal Office 8, Divisional Office 113 a nei bawk. An hmunpui chu Mumbai a ni. LIC Aizawl Branch-ah hian thawktu 140 vel an awm a ni.

Thisen pe

Helen Lowry Higher Secondary School chuan, nimin khan an sikulah blood donation camp an huaihawt a, Aizawl Civil Hospital tan mipa 57 leh hmeichhia 15-te'n thisen unit 72 an pe.

MJA-ah CSR pe

Mizoram Rural Bank (MRB) chuan corporate social responsibility (CSR) aṭangin MJA Public Library Hall sakna atan MJA hnenah Rs. 4,00,000 an pe. CSR sum hi MRB Head Office-a senior manager Lianchungnunga'n MJA president Vanlalrema Vantawl hnenah a hlan a ni. MJA chuan MRB chungah lawmthu a sawi.

Zirlai thar lawm

Mizoram Law College-a Student Bar Council chuan, nimin khan IPR Auditorium-ah zirlai thar lawmna hun an buatsaih a, Higher & Technical Edcuation minister R Romawia'n a hmanpui. Mizoram Law College hi August 25, 1983-a din a ni a, law graduate 390 an chhuak tawh a ni.

Meizial man

Siaha District Anti Tobacco Squad, Legal Metrology leh police-te ṭangho chuan nimin khan New Colony, New Siaha leh Council Veng-ah dawr pathum aṭangin ram dang mei-zial carton pasarih leh packet pasarih an man.

Chairman ruat

Mizoram Assembly hnuaia Public Account Committee chairman atan MNF member Lalruatkima ruat a ni a, Committee on Estimate chairman atan Congress member PC Zoramsangliana leh Committee on Public Undertakings chairman atan Congress member Lalrinliana Sailo te ruat an ni.