Mizo Carbon din dan leh thil tih dante CBI chhuitir turin MNF-in sorkar a phût

MNF vice president R Tlanghmingthanga chuan, Luangmual rama Industrial Growth Centre hmuna M/s Mizo Carbon industry din dan leh an thil tih vel danah thil dik lo tam tak a awm nia sawiin, Central Bureau of Investigation (CBI) chhuitir thuai turin Mizoram sorkar an phût tih a sawi.

R Tlanghmingthanga hian nimin khan MNF president pisaah thuthar thehdarhtute kâwmin, Mizo Carbon chungchanga thil dik lo an hmuhchhuahte a sawi. A sawi danin, Taxation department pek chhuah MVAT certificate-a a lan danin, Mizo Carbon neitu chu Dr Margaret M Varte tih a ni.

Firm & Societies registration-ah chuan Mizo Carbon neitute chu Ravi Gulgulia leh Dr Margaret M Varte tih a ni a; November 26, 2014-a Assembly session-a zawhna Industries Minister-in a chhannaah chuan, Ravi Gulgulia, Dr Margaret M Varte leh M/s Yash Infrustructure Engineers Pvt. Ltd., Guwahati-te an ni thung. Deed of Agreement document-a a lan danin Dr Margaret M Varte-in share 1% a nei a, Ravi Gulgulia-a'n 99% a chang.

M/s Mizo Carbon hian sorkarah Central Transport Subsidy (CTS) leh Central Capital Investment Subsidy (CCIS) an dil a, an dilnaah chuan October-December 2012 chhungin Meghalaya-a Khliehriat aṭangin lungalhthei (coal) metric ton 3690 (kg. 36,90,000) Mizorama phur lut angin an ziak. Lungalhthei chu Rs. 1,16,84,250 sêngin Zoram Transport Company, Zemabawk phurh thlentir ang leh carbon an siam chhuah metric ton 321.26 MT chu Central Lime Industry, Lengpuiah Rs. 26,23,023-a hralh angin ziah a ni.

Tlanghmingthanga chuan, "Zoram Transport Company hi vawiin thlengin Zemabawkah hmuh zawh a la ni lo a, Central Lime Industry pawh a tak hmuh tur a awm lo," a ti a; Mizorama bungraw phurh nan Hauva Filling Station aṭangin diesel tam tham tak an nei anga an insawi laiin, Hauva Filling Station Manager erawh chuan Mizo Carbon-in an hnenah diesel an lak a hriat loh thu a sawi thung niin a sawi.

MNF Vice President sawi danin, RTI Act hmanga Taxation department-a document an dil chhuaha a lan dan chuan, Mizo Carbon hian kum 2011-2015 chhungin Khliehriat, Meghalaya aṭang hian Vairengte leh Bairabi-a Taxation checkgate leh Kolasib-a internal checkgate kaltlangin lungalhthei truck phur 2,372 an la lut anga chhinchhiah a ni. Ni khatah an phurh luh tam ber ni chu April 30, 2013 niin, truck 152-in an phur lut angin an chhinchhiah.

Khliehriat, Meghalaya aṭanga lungalhthei phur a, ni khat chhunga Vairengte/Bairabi Taxation checkgate ṭum hnih leh a aia tam paltlang hman truck 306 an awm tih sawiin, Tlanghmingthanga chuan, "Km. 300 chuanga hlá Khliehriat aṭanga ni khatah truck pakhat-in vawi hnih, vawi thum, vawi li, vawi nga leh vawi ruk thlengte pawh an lehláng anga record a ni," a ti. Truck registration no. GJ-07 VW-2672 chu April 30, 2013 khan Taxation checkgate-ah lungalhthei phurin vawi ruk a inhriattir a ni.

Lungalthei tam tham tak Khliehriat aṭangin Mizo Carbon Industry-ah phur lut anga tarlan a nih laiin, MNF Vigilance department-in June 22, 2016-a industry an enfiahnaah, a panna kawng enin truck rit phur 2,372 luh theihna a nih loh thu sawiin, R Tlanga chuan, "Lungalhthei truck trip khat pawh tling lo awm vel, hnim nen a lo awm niaih chauh a ni," a ti.

Taxation checkgate-a lungalhthei phur truck 2,372 lut anga chhinchhiah zinga eng emaw zat chu Bairabi checkgate-a inziak lut anga chhinchhiah an ni tih sawiin, Tlanghmingthanga chuan, "Bairabi-a Taxation checkgate hi MNF sorkar lai, kum 2008-a din a ni a, mahse a function zui lo, a ti a, tun thlengin hman a la ni lo niin a sawi.

MNF Vice President chuan, Mizo Carbon din dan leh chumi hmanga sum siam danah thil dik lo lian tak a awm ngeia a lan thu sawiin, "CM Pu Lal Thanhawla hian eirukna a zung nena phoro a intiam ang ngeiin, a nihna dik tak hmu chhuak turin CBI chhuitir vat turin kan phût tlat a ni," a ti.