Serchhip police-te'n NDPS Act zir

Serchhip District Executive Force chuan, nimin khan Serchhip SP conference hall-ah ruihhlo do beihpui atana inbuatsaih nan, The Narcotic Drugs and Psychotropic Substances Acts (NDPS Act) case chungchanga thil chhui dan an zir.

Serchhip SP Lalringdika chuan,ṭha zawka hna thawh a nih theih nan intuaihriamna neih a ni chu lawmawm a tih thu a sawi a, "Ruihhlo hmanga sumdawngte leh dan bawhchhiate hi NDPS Act hmanga ûmzuia hremna pek ṭhin an ni a, misualte hnena an phu tâwk hremna pek dawn chuan man an nih lai aṭangin he danin min hrilh ang thlapa kan kal a ngai," a ti.

Lalringdika chuan, misual leh dan bawhchhia man harsa tak takte man an nihin chawimawinate inpek ṭhin a nih thu sawiin, "Dan bawhchhiate'n an phu tâwk hremna an hmuh ngei theihna turin dan ang taka engkim kan kalpui zel a, Court-in engtin nge thutlukna a siam tih thlenga ngeihven zui hi kan mawhphurhna a ni," a ti a; NDPS Act hmanga mante chu thiam loh chantir vek an nih theihna tura inbuatsaih a ṭul thu a sawi.

Training-ah hian Serchhip district-a police awm inspector, sub-inspector leh literate constable-te an tel a ni.