Mi buma puh police-te'n man

Facebook leh Whatsapp kaltlanga Tetea Hmar tih hming hmanga ram dang - Australia, USA, UK, Canada leh New Zealand vela lehkha zir zawm duh leh hna thawk duhte pui thei nia insawia advertisement titu, Eleazer Rozarmawia (22) s/o Lalrothanga, Saipum, Kolasib district, tuna Bawngkawn Chhimvenga khawsa mek chu August 31, 2016 khan police-in an man.

Police thuchhuah tarlan danin, Eleazer Rozarmawia hian thla thum vel kal ta aṭangin ram danga lehkha zir duh leh hna thawk duhte a zawng a, amah dawrtute hnen aṭangin a tlangpuii mi pakhatah Rs. 20,000 - 40,000 inkar leh an lehkha pawimawhte a laksak ṭhin. Mahse, buaipui hlawhtlin saka ram danga lehkha zir emaw, hna thawk emaw an awm hriat a la ni lo.

Police thuchhuah chuan, Eleazer Rozar-mawia hian certificate lem pawh Rs. 1,00,000 vel chawiin a siamsak thei angin a insawi bawk ṭhin niin a tarlang bawk.

Police-te chuan, mimal emaw, agency emaw kaltlanga hna thawh tur leh lehkha zir chhunzawm duhte pui thei anga insawite chu an rintlak leh rintlak loh chhui chiang hmasa ṭhin turin mipuite an chah a, "Mimal emaw agency emaw, a lem kan hria a nih chuan police hnenah hriattir vat zel turin kan ngen e," an ti.