Congress ṭhalaiin buhfai kudam tlawh

Congress party ṭhalaite chuan, nimin khan an president Vanlalawmpuii Chawngthu hoin Tanhrila FCI kudam leh Zuangtuia Supply kudam an tlawh a, buhfai dinhmun an enfiah.

Vanlalawmpuii Chawngthu, MLA chuan, "Fûr lai leh kawng chhiat hun laia buhfai ṭhahnem tak sorkarin a dah khawl thei hi a lawmawm kan tih avangin a hmun ngeia tlawh kan ni. Zuangtuiah phei chuan tun dinhmunah kudam a khat a, dahna tur a indaih loh avangin motor aṭanga unload lohte pawh a awm," a ti a; fûr laia buhfaia harsatna a awm loh nana theihtawp chhuahtute zawng zawng chungah an lawm thu a sawi.

MPYCC-te hi FCI kudamah manager M Haque leh inspector Vanlalhriata ten an lo dawngsawng a; buhfai dinhmun a ṭhat thu leh Bairabi lama mi pawh phurh sên loh a nih thu an lo hrilh.

Kudam enkawltute'n MPYCC an hrilh danin, FCI kudam chu pathumah ṭhen a ni a, metric ton 45,090 vel a leng a, tun dinhmunah buhfai metric ton 7,100 vel a awm. Traffic jam pumpelhna atan kudam pan lo a, a dahna hmun tura phurh thlen nghalte pawh a awm a ni.

Supply kudamah chuan inspector Lalrinsanga'n buhfai quintal 49,450 an neih mek thu leh FCI kudam aṭangin quintal 50,000 lak tur an neih thu a lo hrilh a, "Buhfai lak tur nei mah ila, kan pek chhuah phawt loh chuan dahna kan nei tawh rih lo," a ti.