Polling Station siam rem rel

Special Summary Revision of Photo Electoral Rolls lo awm leh tur atana inbuatsaihna kal zelah, nimin khan Serchhip DC conference hall-ah meeting neih a ni a, Serchhip district chhunga polling station pali siam rem dan tur an rel.

Meeting-ah Serchhip bial chhunga New Serchhip II, voters 555 te awmna polling station atana hman mek Elite Middle School chu polling station area pawnah a awm a, polling station area chhungah Government Pri-mary School a awm tho si avang-in hetah hian sawn ṭha an tih thu te, Tuikum bial chhungah Khawbel, voter 384 awmna polling station atana Government Primary School hman mek chu electric a luh loh bakah lirthei a luh theih loh avangin Government Middle School zawk chu polling station atana hman a remchan zawk thute, Hrangturzo bial chhunga Hmunzawl, voters 305 awmna polling station atana hman mek Government Middle School chu khaw dai hla deuh taka awm a nih avangin, Government Primary School a sawn mai a remchang nia an hriat thute leh, N Vanlaiphai III, voter 598 awmna polling station atana hman Government Primary School V chu sawrkar in Government Primary School III tia a hming thlak a nih tak avanga polling station hming pawh thlak ve mai a ṭul nia hriat a nih thute tarlan a ni.

Polling station siam rem ṭul hrang hrang tarlante hi meeting chuan an pawm a, Joint Chief Electoral Officer hnenah phal sakna dila la thawn thlak leh tur a ni dawn a ni.